डोटीमा सौताको हत्या आरोपमा एक महिला पक्राउ

२२ चैत, २०८०

सौताको हत्या गरेको आरोपमा डोटीमा प्रहरीले एक महिलालाई पक्राउ गरेको छ । ४२ वर्षीया दुर्गा घर्तीमगरको हत्या आरोपमा बडीकेदार गाउँपालिका वडा नम्बर २ की ३७ वर्षीया यमुना घर्तीमगर पक्राउ परेकी हुन् ।

बडीकेदार गाउँपालिका–२ कोटकेलाका दलबहादुर घर्तीमगरकी जेठी श्रीमती कोटकेना खोलामा रहेको पानी घट्ट भित्र मृत फेला परेकी थिइन् । उनी यही चैत १२ गते दिउँसो घट्ट जान्छु भनेर घरबाट निस्किएकोमा नफर्किएपछि खोजी गर्दा चैत १३ गते बिहान घट्ट भित्र मृत फेला परेकी थिइन् ।

मृतककी भाइ बुहारी डम्मरी थापामगरले चैत १४ गते मृतकी कान्छी सौता यमुना घर्तीमगरको नाममा कर्तव्य ज्यान सम्बन्धी किटानी जाहेरी दिएपछि उनलाई प्रहरीले पक्राउ गरेको हो ।

यमुनाले ढुङ्गा, काठको आँडो, हँसिया र बन्चरो टाउँकोमा प्रहार गरी दुर्गाको हत्या गरेको प्रारम्भिक अनुसन्धानबाट खुलेको प्रहरीले जनाएको छ ।